चिवडा हा मुलांचा आवडता पदार्थ. सण-वार काळात तर घरात हमखास चिवडा असतो. मुलांचा हा आवडता पदार्थ आणखी वेगळ्या पद्धतीने चविष्ट आणि पौष्टिक बनवता आला तर..? यासाठीच आपण ‘पौष्टिक डब्याची चविष्ट रेसिपी’ या सदरात या वेळेस पाहणार आहोत डाळींचा चिवडा......................
एकूणच चिवडा हा प्रत्येक घरात असणारा पदार्थ. परंतु आपण फार फार तर पोहे, चुरमुरे यांपासून चिवडा बनवतो. यामध्ये फार पौष्टिक असे काही नसते, शिवाय हा पदार्थ तसा पोटभरीचा होत नाही. मुलांच्या या आवडीच्या पदार्थात वेगळे काही नक्कीच करता येऊ शकेल.
पोह्यांचा चिवडा बनवताना त्यात भाजलेले किंवा तळलेले शेंगदाणे व फुटाण्याचे डाळं, काजू-बदामही घालावेत. त्यामुळे पोषणमुल्ये वाढतात. डाळींचा चिवडा या पदार्थात दोन पदार्थ एकात मिसळणे म्हणजेच स्वतःसाठी काहीतरी करणे, हा आनंद मुलांना घेता येतो. शिवाय कोथिंबीर, पिवळ्या डाळी आणि पांढरा चिवडा हे सगळे रंग एकत्र आल्याने तो आकर्षकही दिसतो.
साहित्य : जाड पोह्यांचा तळलेला चिवडा किंवा डाएट चिवडा – एक वाटी (हे दोन्ही चिवड्यांचे प्रकार पांढऱ्या रंगाचे असतात), भिजवलेली हरभरा डाळ – दीड चमचा, भिजवलेली मुग डाळ – दीड चमचा, ओले खोबरे – तीन चमचे, लिंबाचा रस – एक चमचा, तेल-हळद-हिंग-जिरे – फोडणीसाठी, शेव आणि कोथिंबीर – वरून पेरण्यासाठी, सजावटीसाठी
कृती :
- सर्वप्रथम एका कढईत एक चमचा तेल घालून त्यात भिजवलेल्या डाळी वाफवून घ्या.
- कोरड्या वाटल्यास वरून एक पाण्याचा शिपका मारून त्यावर झाकण ठेऊन परत वाफ येऊ द्या.
- त्यांनतर त्यात चवीप्रमाणे मीठ व तिखट घाला आणि गॅस बंद करा.
- या डाळी थंड झाल्यानंतर त्यात लिंबू पिळून कोथिंबीर व ओले खोबरे घालावे.
- सर्व्ह करताना या डाळी आणि पोह्याचा चिवडा वेळेवर एकत्रित करून घ्यावा.
- मुलांना डब्यात देतानाही या डाळी आणि चिवडा वेगळा द्यावा आणि वेळेवर तो एकत्र करून घेण्यास सांगावे. असे केल्याने शेव आणि चिवडा कुरकुरीत राहून तो जास्त चविष्ट लागतो.
- आश्लेषा भागवत
ई-मेल : ashlesha0605@gmail.com
(लेखिका पुण्यातील आहारतज्ज्ञ आहेत.)